Schwangerschaftsabbruch

En Abdriibig oder Schwangerschaftsabbruch (medizinisch abruptio graviditatis oder induzierte Abort) isch s, wenn män ere Schwangerschaft, wo d Frau nid will oder wo für iiri Gsundhäit gföörlig isch, absichtlig vor dr Zit en Ändi macht. Dr abdribnigi Embryo oder Fötus überläbt dr Iigriff normalerwiis nit. Dr medizinisch Begriff Abort isch allgemäiner und umfasst nid nume d Abdriibig sondern au die natürligi Feelgeburt.

Öb s Abdriibe söll erlaubt si isch scho sit langem e heftig umstrittens Thema. Uf dr äinte Site git s religiösi und ethischi Vorstellige, gsellschaftligi Aasprüch und s Rächt uf s Lääbe vom Embryo bzw. vom Fötus, uf dr andere s Sälbstbestimmigsrächt und mänggisch sogar s Rächt uf Lääbe und Gsundhäit vo dr Frau. Die underschidlige ethische Beurdäilige häi zum e bräite Spektrum vo juristische Reegle gfüert, wo von ere fast vollständige Entschäidigsfreihäit vo dr Schwangere goot bis zu völlige Verbot mit herte Stroofe.